«Եվրոպական Միություն - Վիետնամ ազատ առևտրի համաձայնագիր՝ Առևտրի և ներդրումային համագործակցության լծակներ նոր նորմալ պայմաններում» խորագրով Վիետնամ-ԵՄ ազատ առևտրի համաժողովը

27 հոկտեմբերի, 2021

Ս.թ. հոկտեմբերի 27-ին Հանոյում տեղի է ունեցել «Եվրոպական Միություն - Վիետնամ ազատ առևտրի համաձայնագիր՝ Առևտրի և ներդրումային համագործակցության լծակներ նոր նորմալ պայմաններում» խորագրով Վիետնամ-ԵՄ ազատ առևտրի համաժողովը (European Union –Vietnam Free Trade Agreement (EVFTA) Leverage for trade and investment cooperation in the new normal)։

Ողջույնի խոսքով հանդես է եկել Վիետնամի Սոցիալիստական Հանրապետության արդյունաբերության և առևտրի փոխնախարար Դանգ Հոանգ Անը (Dang Hoang An):

Ելույթներով հանդես են եկել նաև Վիետնամում Եվրոպական Միության պատվիրակության ղեկավար Ջիորջիո Ալիբերտին (Giorgio Aliberti) և Վիետնամում Եվրոպական առևտրաարդյունաբերական պալատի նախագահ (European Chamber of Commerce in Vietnam) Ալեն Կանին (Alain Cany):

Պարոն Անը հակիրճ ներկայացրել է ԵՄ-ի և Վիետնամի միջև ապրանքաշրջանառության ցուցանիշները Եվրոպական Միություն – Վիետնամ ազատ առևտրի համաձայնագրի շրջանակներում, որն ուժի մեջ է մտել 2020 թվականի օգոստոսի 1-ից։ Վիետնամի Սոցիալիստական Հանրապետության արդյունաբերության և առևտրի փոխնախարարը նշել է, որ Վիետնամը դարձել է ԵՄ-ի խոշորագույն առևտրային գործընկերն ASEAN տարածաշրջանում։

Վիետնամում Եվրոպական Միության պատվիրակության ղեկավար Ջիորջիո Ալիբերտին նշել է, որ Վիետնամից Եվրոպական Միության երկրներ ապրանքների արտահանումն աճել է 20 տոկոսով, չնայած COVID-19 համավարակի առկայությանը։

Վիետնամում Եվրոպական առևտրաարդյունաբերական պալատի նախագահ Ալեն Կանին նշել է, որ COVID-19 համաճարակը խորը և հեռու գնացող ազդեցություն է ունեցել առևտրի և ներդրումների վրա ինչպե՛ս Վիետնամում, այնպե՛ս էլ ամբողջ աշխարհում՝ սկզբում ներառելով զբոսաշրջության և ավիացիայի, այնուհետև այլ ոլորտներ: Պարոն Կանին նաև ընդգծել է, որ երկարատև արգելափակումները ոչ միայն վտանգի տակ են դնում ներդրումներն, այլև ստիպում են յուրաքանչյուր հինգ ընկերություններից մեկին իր արտադրության առնվազն մի մասը տեղափոխել այլ երկրներ:

Ողջույնի և բացման ելույթներից հետո տեղի են ունեցել պանելային քննարկումներ, որից հետո բանախոսները պատասխանել են ներկաների հարցերին։

Վիետնամ-ԵՄ ազատ առևտրի համաժողովին ներկա էին Վիետնամի Սոցիալիստական Հանրապետության շահագրգիռ նախարարությունների ներկայացուցիչներ և ՎՍՀ-ում հավատարմագրված այլ երկրների դիվանագիտական ներկայացուցչությունների և միջազգային կազմակերպությունների ներկայացուցիչներ:

ՎՍՀ-ում ՀՀ դեսպանության երկրորդ քարտուղար Արամազդ Մուրադյանը մասնակցում էր ՀՀ «Եվրոպական Միություն - Վիետնամ ազատ առևտրի համաձայնագիր - Առևտրի և ներդրումային համագործակցության լծակներ նոր նորմալ պայմաններում խորագրով համաժողովին։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր